'तसदी'

लेखणीतील अक्षरांचा रंग 

निळा  किंवा भगवा आहे म्हणून ;

त्या रंगाखाली मला घुसडण्याचा प्रयत्न करू नका.. 

मला योग्य वाटेल , आवडेल तो रंग ,

फक्त 'लेखिणीचा रंग उठून दिसावा' 

म्हणूनच वापरलेला असेल.. 

संविधानाने नेमून दिलेल्या पदांचा सन्मान करणं 

हे माझं कर्तव्य मी जाणते पण ;

त्या पदस्थ व्यक्तीचा आदर्शवाद ,

कृपया माझ्यावर लादू नका.. 

तुम्ही 'एखाद्या'च रंगाची होळी 

माझ्या टाळूवर ओतण्याचे कष्ट मात्र घेऊ नका .. !!

चूक - बरोबरच्या स्तंभांमधे तोलून

कुण्या इसमाचं आयुष्य तडीस लावण्यात 

मला मुळीच रस नाही.. 

तुम्ही ते करण्यास भाग पडू नका..!! 

भले तुम्हीच खुशाल मला 

'त्या दोन स्तंभां'मधे तोलला.. 

तुमच्या दृष्टीने बहिष्कृत म्हणून 

जगल्याचा आनंद साजरा करता येईल..!

माझ्या अवतीभोवती गर्दी आहे कैक अत्तरांची.. 

म्हणून एखादं अत्तर मला भेट देऊ नका.. !!

माझ्या रंगीबेरंगी असण्यावर 

निसर्गाला जेव्हा आक्षेप असेल तेव्हा ,

तो समूळ नष्ट करेल माझं अस्तित्व ;

माझ्या अस्तित्वावर कोणता शिक्का मारावा ;

याची तसदी कृपा करून तुम्ही घेऊ नका..!!!