' कुणीतरी असावं... '

कुणीतरी असावं ,
तिचा बिछाना
कायमचा आवरणारं...
तिच्या देहाला माणूस म्हणून
जगायला शिकवणारं...

कुणीतरी असावं ,
तिच्या लक्षवेधी मांड्यांवर
कापड टाकणारं...
तिच्या अतीव वेदनांतूनही
तिला आपलंसं करणारं...

कुणीतरी असावं ,
तिच्या शरीराऐवजी तिच्यातल्या
माणुसपणावर प्रेम करणारं...
तिला स्वतःचं  'असं ' गणित
मांडण्यापासून रोखणारं...

कुणीतरी असावं ,
पैशाच्या खेळात स्वतःचं शरीर
लिलावात विकणाऱ्या तिला थांबवणारं...
'त्यांची' भूक भागवत जीवन कंठणाऱ्या
तिचा खांदा बनणारं...

कुणीतरी असावं ,
तिच्या विवस्त्रपणाला झाकणारं...
तिच्याकडे मायेने बघणारं...
आणि
कुणीतरी असावं ,
तिच्यातली 'माय' शोधणारं...
तिच्यातली 'माय' शोधणारं...

                                               शामल दीपा 
                              shamaldeepa00@gmail.com